Mit de PLATTform gifft dat bi den Schleswig-Holsteinische Heimatbund e.V. (SHHB) en ne‘e Nedderdüütsch-Medienprojekt. Alina Dwenger un Karsten Tolle billt dat Redakschoonsteam. Siet 05. Januor löppt nu de ne´e Radiosennen, de vun de beiden modereert warrt. För kulturkanal.sh kiekt se as Team op 2026:
Ne’e Radiosennen in 2026
In 2026 warrt dat „luud & düütlich“, denn vun Anfang Januor an kümmt en nee nedderdüütsche Radiosennen, de de Regionalspraak in’n Middelpunkt sett un so den Spraakbeholl föddern un oprechterhollen will.
Nedderdüütsch hett för dat Land Sleswig-Holsteen en kulturelle un identitätformende Bedüden un dat al siet veele Johrhunnerten.
Dorüm warrt mit düsse ne‘e Radioanbott en groot Stück sleswig-holsteensche Spraakkultur anstött un föddert, denn de hele Sennen warrt op Plattdüütsch modereert, inklusiev enkelt utsöcht Musikstücken.
luud & düütlich
De ne‘e Radiosennen luud & düütlich kann vun den 05. Januor an dääglich vun Maandag bet Sünnavend över DAB+ un UKW över verschedene Kanals vun OK SH (Offener Kanal Schleswig-Holstein) OK SH un över de Livestreams höört warrn.
As Modertschoonsteam freut wi uns besünners, dat wi de Spraak in’n Alldag vun de Sleswig-HolsteenerInnen „luut & düütlich“ maken köönt. Wi hopen dorop, dat Plattdüütsch för de Hörers negererbi warrt un dat sik en Verbunnenheitsgeföhl mit dat spraakliche Kulturgoot billt. Denn Plattdüütsch kann en Heimatgeföhl utlösen.
Junge Lüüd
Wi wüllt mit uns Radiosennen dat Klischee „Platt snackt blots ole Minschen“ afwennen un ok heel bewusst junge Hörersche und Hörers ansnacken. Denn Plattdüütsch is al lang keen „Ole-Lüüd-Spraak“ mehr – heel in’t Gegendeel: Plattdüütsch is modern!
Modern schüllt ok de Inholten vun de Radiosennen ween. Dor warrt över aktuelle Themen un Trends snackt, op regionale Aktivitäten un Veranstalten henwiest un ok dagaktuelle Narichten sennt.
För all bruukbor
De beiden Moderaters sünd sülvst noch jung oder jung bleven un streven dormit dat Anspreken vun en jüngere Zielgrupp an. Generell warrt de Sennen aver so utleggt sien, dat jümmer elkeen luud & düütlich hören kann – enerlei, wat jung oder oolt, Platt-Snacker oder Spraak-Anfänger.
(Ein Neujahrssstatement von Alina Dwenger und Karsten Tolle)
→ to de Nettsiet vun de SHHB: de nee PLATTform
→ direkt to de Kanals un Senntieden
Transparenzhinweis: Dat Projekt warrt vun de Medienanstalt Hamborg/Sleswig-Holsteen (MA HSH) mit Geller vun dat Land föddert.
Dorto passt:
Op kulturkanal.sh gifft dat ok noch mehr op Platt. Kiekt mol in in unse Plattschnack:
