Britta Poggensee is Referentin för Nedderdüütsch un Freesch bi den Schleswig-Holsteinische Heimatbund e.V. (SHHB). För kulturkanal.sh kiekt se op ehr kulturellet Johr 2026:
Platt in de Medien
Dat Johr 2026 fangt mit en plattdüütschet Lüchttormprojekt bi den SHHB an. De ne‘e
PLATTform, de elkeen Dag en halve Stünn över den Apen Kanal Narichten un Bidrääg op Plattdüütsch sennen warrt, is en wichtig Pedd üm de nedderdüütsche Spraak mehr in de Medien to platzeren, sichtbor un höörbor to maken. Wi freut uns, dat wi den Toslag vun de Medienanstalt HSH kregen hebbt un 2026 en plattdüütschet Radioprogramm anbeden köönt.
De Plattdüütsche Raat
Ok den Spood vun den Plattdüütsche Raat SH, de sik polietsch för de plattdüütsche
Sprekergrupp insetten deit, is dat to verdanken, dat düt Projekt op de Been kamen is. Man dat gifft noch veel to doon op dat Rebeet. Na dat 25 Jubeljohr 2025 stellt sik de Raat mit de Neewahlen in Mai 2026 wedder nee op.
Schölers leest Platt
2026 is ok wedder dat Johr vun Schölers leest Platt. All siet över 30 Johren warrt de lannswiede Leeswettstriet vun den SHHB utricht. Üm un bi een viddel vun all Scholen in‘t Land nehmt all twee Johr deel. Somit kriggt vele junge Lüüd en Kuntakt to de Spraak. Sünnerlich dat Finaal is jümmers en feinet Beleevnis, wenn all Deelnehmer*sche tosamen kaamt un sik vun de stolten Familienlittmaten un Lehrkräft op en grote Bühn fiern laten.
Heel privat freu ik mi wedder dorop, Theater an de Nedderdüütsche Bühn Kiel spelen to dörven. Dat is jümmers en grote Freud un maakt bannig veel Spaaß mit dulle Minschen op de Bühn to stahn un en Stück to spelen. Todem heff ik mi vörnahmen, ok sülvst mehr in‘t Theater to gahn.
So gifft dat veel to kregen in‘t Johr 2026, privat man ok op de Arbeit un dorop freu ik mi!
(Ein Neujahrsstatement von Britta Poggensee)
→ to de Nettsiet vun de SHHB: Nedderdüütsch un Freesch
→ to de Nettsiet vun de SHHB: de nee PLATTform
Dorto passt ok düsse Utblick:
Op kulturkanal.sh gifft dat ok noch mehr op Platt. Kiekt mol in in unse Plattschnack:
